ANDEREAK TALDEAK DANBOR ETA ABESTIEKIN SALATUKO DU EMAKUMEEN AURKAKO
INDARKERIA
Durangoko Andereak elkarte feministak hileroko elkarretaratzea
deitu du maiatzaren 29an, ostegunean, 18:30ean, Andra Marin, emakumeen aurkako
indarkeria salatzeko. Oraingo honetan, protestak artearen eta musikaren indarra
erabiliko du, erresistentziaren eta oroimen kolektiboaren sinbolo gisa entzungo
diren danbor eta abesti aldarrikatzaileekin.
Musika Silvia Palumbo artista argentinarrak eskainiko du,
kantautore, hezitzaile eta aktibista feminista, Ahalduntze Adierazkor Feminista
(AAF) proposamenaren baitan hainbat ekimen aurkezteko Euskal Herrian biran
dabilena. Kontzentrazioan zehar partekatuko dituen abestiek modu kritiko eta
poetikoan jorratzen dituzte patriarkatuaren aurkako borroka, emakumeen isilaldi
historikoa eta haien ahotsak kantuaren, erritmoaren eta gorputzaren bidez
berreskurapena.
Silvia Palumboren hitzaldi-emanaldia
Ondoren, 19:00etan Andragunean, Palumbok "Música
Maestra: del androcentrismo y sexismo en la música al empoderamiento expresivo
feminista" hitzaldi-performancea eskainiko du. "Partitura patriarkal
bati buruzko gogoetak" azpitituluarekin, hitzaldiak ibilbide bat
proposatzen du emakumeak musikaren historian baztertzeko mekanismoetan barrena,
baita feminismotik espazio hori berradierazteko estrategia kolektiboen aldeko
apustua ere. Proposamen parte-hartzailea izango da, analisia, narrazioa,
zuzeneko musika eta publikoarekin solasaldia uztartzen dituena.
Silvia Palumbo Latinoamerikako musika feministaren eszenaren
parte da, 150 abesti konposatuta baino gehiagorekin, eta gaur egun hainbat
ekimen garatzen ditu. Biran dabil Euskal Herrian. Bere ekoizpen guztia
autogestiboa eta independentea da, eta agindu komertzial edo patriarkalik
gabeko sorkuntzarekin duen konpromisoa berresten du.
