Feminismoaren fama

Gure eskualdeko bilera batean emakumeen partaidetzaz ari ginela, kudeatzaile bikaina den emakume bati zera entzun nion: “ni ez naiz feminista baina…” . Mingarria suertatu zitzaidan adierazpena eta neure kautan pentsatu nuen: “beharbada zure aurretiko feministen lanagatik ez balitz zu ez zinateke aulki horretan egongo” baina tira, hor geratu zen.
Halere, mespretxu kutxua zerion adierazpen hura burutik kendu ezinda ibili naz luzaroan, eta behin eta berriz itaun bera zetorkidan: Zergatik bihurtu ote da feminista hitza hain deserosoa? Jakin badakit feminismoak ez duela izen onik zenbait alorretan baina, egia esan ez dakit zergatik duen hain fama txarra. Batzuetan iruditzen zait goi mailara heldu diren zenbait emakume ez ote diren feministatzat hartuko dituzten beldur edo lotsa.
Zorionez badago feminista izateaz lotsatzen ez den famaturik ere. Egun hauetan Onintza Iruretari irakurri diot Emma Watson aktore britainiarrak, Harry Potter film sortako heroiak, 18 urterekin erabaki zuela feminista izatea. Aktore honek orain 24 urte ditu eta joan den irailean Nazio Batuen Erakundearen egoitzan genero berdintasunaren aldeko hitzaldi interesgarria eskaini du.
Emakumeentzat ez eze, gizonentzat ere mezu sakonak jaurti ditu bere hitzaldian, baita galdera zorrotzak ere. Enmaren esanetan, ezer egiten ez badugu, 75 edo 100 urte beharko ditugu emakumeok gizonek besteko soldata jasotzeko, edota 15,5 milioi neskato oraindik ume direla ezkonduko dituzte datozen 16 urteotan, eta goazen martxan Afrikako neskatoak ez dira bigarren hezkuntzara helduko 2086 arte.
Panorama horren aurrean, gizon eta emakumeon arteko egungo ezberdintasunak desagertu daitezen, elkarturik jokatu behar dugula dio Enmak. Nire ustez, nahiz eta jai giroan murgildurik egon, merezi du Emma Watsonen hitzaldi osoa entzutea.
HeForShe (subtitulado) Spanish subtitles - YouTube Emma Watsonen hitzaldia gaztelaniara transkribatua
Hitzaldiak oihartzun itzela izan du sare sozialetan. Adibidez mutil batek idatzitako ondorengo eskutitz honek gogoeta egiteko bidea eman diezaguke.
El discurso de Emma Watson inspiró a un chico a escribir una carta

Marisa Barrena
http://www.durangon.com